چین میں 10G انٹرنیٹ سروس متعارف!

چین نے جدید ترین 10 جی براڈ بینڈ انٹرنیٹ سروس متعارف کرا دی ہے، جسے ڈیجیٹل دنیا میں ایک اہم پیش رفت قرار دیا جا رہا ہے۔

غیر ملکی خبررساں ادارے کے مطابق، اس سروس کی ڈاؤن لوڈ اسپیڈ 9,934 میگا بائٹس فی سیکنڈ جبکہ اپ لوڈ اسپیڈ 1,008 میگا بائٹس فی سیکنڈ ہے۔ اس غیر معمولی رفتار کے باعث صارفین محض 20 سیکنڈ میں تقریباً 20 جی بی پر مشتمل فل لینتھ 4K مووی با آسانی ڈاؤن لوڈ کر سکیں گے۔

ماہرین کا کہنا ہے کہ چین کی جانب سے 10 جی انٹرنیٹ کی فراہمی نہ صرف ٹیکنالوجی کے شعبے میں ایک بڑا قدم ہے بلکہ اس سے صحت، تعلیم اور زراعت جیسے اہم شعبوں کی کارکردگی میں بھی نمایاں بہتری آئے گی۔

حکام کے مطابق، اس لانچ کے بعد چین تجارتی سطح پر 10 جی نیٹ ورکس متعارف کرانے والے ممالک میں سب سے آگے ہے۔ تیز رفتار ڈیٹا ٹرانسمیشن کی بدولت یہ نیٹ ورک ان شعبوں کے لیے بھی معاون ثابت ہوگا جنہیں مستحکم اور تیز رفتار انٹرنیٹ کی ضرورت ہوتی ہے، جن میں ٹیلی میڈیسن، ریموٹ ایجوکیشن، اسمارٹ ایگری کلچر اور انڈسٹریل آٹومیشن شامل ہیں۔