چیمپئنز ٹرافی سے قبل اہم کھلاڑی پر 5 سال کی پابندی

انٹرنیشنل کرکٹ کونسل (آئی سی سی) نے بنگلہ دیش کی ویمنز ٹیم کی سپنر سہیلی اختر پر میچ فکسنگ کے الزامات کے تحت 5 سال کی پابندی عائد کر دی ہے۔ یہ پابندی ویمنز ٹی ٹوئنٹی ورلڈ کپ 2023 کے دوران لگائی گئی تھی، جس میں سہیلی اختر پر کرکٹ کے تمام فارمیٹس میں پابندی عائد کی گئی ہے۔

36 سالہ کھلاڑی نے آئی سی سی اینٹی کرپشن کوڈ کی پانچ شقوں کی خلاف ورزی کا اعتراف کرتے ہوئے الزامات کو تسلیم کیا۔ سہیلی اختر کی پابندی کی مدت 10 فروری 2025 سے شروع ہو چکی ہے۔ اس پابندی کا اعلان کرتے ہوئے آئی سی سی نے کہا کہ سہیلی اختر نے کرکٹ کے قوانین کی سنگین خلاف ورزی کی ہے۔

رپورٹس کے مطابق 2023 میں ڈھاکا کے ایک نیوز چینل نے ایک آڈیو جاری کی تھی، جس میں 2 کرکٹرز کے درمیان مبینہ گفتگو سنی گئی تھی۔ اس آڈیو میں یہ بات سامنے آئی کہ جنوبی افریقہ میں ہونے والے ویمنز ٹی ٹوئنٹی ورلڈ کپ کے دوران لتا مونڈل نے سہیلی اختر سے رابطہ کیا تھا، تاہم سہیلی اختر نے ان الزامات کو مسترد کرتے ہوئے اسے ایک غلط فہمی قرار دیا تھا۔

سہیلی اختر، جو کہ ایک آف اسپنر ہیں، بنگلہ دیشی ویمنز ٹیم کی جانب سے 2 ون ڈے اور 13 ٹی ٹوئنٹی انٹرنیشنل میچز کھیل چکی ہیں۔