ٹرمپ نے یوکرین تنازع کا الزام یوکرین پر ہی عائد کر دیا

امریکی صدر ٹرمپ نے امریکا-روس مذاکرات کے بعد یوکرین تنازع کا الزام یوکرین پر عائد کرتے ہوئے کہا کہ یوکرین کو جنگ شروع نہیں کرنی چاہیے تھی اور وہ معاہدہ کر سکتا تھا۔

مار اے لاگو میں صحافیوں سے گفتگو کرتے ہوئے ٹرمپ نے کہا کہ یوکرین کو سعودی عرب میں امریکا-روس اعلیٰ سطح مذاکرات میں شامل نہ ہونے کی پریشانی ہے، لیکن اس کے پاس تین سال سے زیادہ وقت تھا، اور یہ معاملہ آسانی سے حل ہو سکتا تھا۔

ٹرمپ نے ریاض میں ہونے والی ملاقات کے بارے میں کہا کہ وہ پر اعتماد ہیں اور ان کے پاس اس جنگ کو ختم کرنے کی طاقت ہے، جبکہ روس بھی بربریت کو روکنا چاہتا ہے۔

سعودی دارالحکومت میں امریکا اور روس کے اعلیٰ سطح وفود کی ملاقات کے بعد یوکرین جنگ کے خاتمے کے لیے مذاکراتی ٹیمیں مقرر کرنے پر اتفاق ہوا۔ امریکی وزیر خارجہ مارکو روبیو نے کہا کہ روسی وفد سے 4 اصولی باتوں پر اتفاق ہوا ہے، لیکن یورپی یونین کو بھی شامل کرنے کی ضرورت ہوگی۔

روسی وزیر خارجہ سرگئی لاروف نے کہا کہ امریکا کو بتایا ہے کہ نیٹو کی توسیع روس کے لیے براہ راست خطرہ ہے، اور امریکا-روس کے درمیان سفارتی مشنز کے لیے تمام رکاوٹوں کو ہٹانے پر اتفاق کیا گیا ہے۔