جعفر ایکسپریس پر دہشتگردوں کا حملہ، عورتوں اور بچوں کو یرغمال بنا لیا، فورسز کا آپریشن جاری

بولان میں جعفر ایکسپریس پر دہشتگردوں کا بزدلانہ حملہ، عورتوں اور بچوں کو یرغمال بنا لیا۔ سکیورٹی فورسز کا آپریشن جاری ہے۔

ذرائع کے مطابق دہشت گردوں نے عورتوں اور بچوں کو ڈھال بنایا ہوا ہے۔ سیکیورٹی فورسز نے دہشت گردوں کا گھیراؤ کر لیا ہے اور فائرنگ کا تبادلہ جاری ہے۔ مشکل علاقہ ہونے کی وجہ سے پیچیدہ آپریشن انتہائی اختیاط سے کیا جا رہا ہے۔ سیکیورٹی فورسز دہشتگردوں کے خاتمے کیلئے پرعزم ہے۔

جعفر ایکسپریس پر دہشت گردوں کے بزدلانہ حملہ پر انڈین اور ملک دشمن سوشل میڈیا غیر معمولی طور پر متحرک ہے۔ بزدلانہ حملہ ہونے کے وقت سے لے کر بھارتی میڈیا اور سوشل میڈیا اکاؤنٹس ملکر مسلسل گمراہ کن، جھوٹا اور فیک پروپیگنڈا کرنے میں مصروف ہیں۔

پروپیگنڈا اور فیک نیوز پھیلانے میں پرانی ویڈیوز، اے آئی سے تیار کردہ ویڈیوز، پرانی تصاویر، فیک وٹس ایپ پیغامات اور پوسٹرز کے ذریعے ہیجان پیدا کرنے کی مذموم کوشش کی جا رہی ہے۔ دہشت گردوں سے جڑے سوشل میڈیا اکاؤنٹس بھی پاکستان مخالف زہر اگلنے میں بھارت میڈیا کا بھرپور ساتھ دے رہے ہیں۔

بھارتی میڈیا پاکستان سے باہر بیٹھے خود ساختہ بھگوڑے بلوچ رہنماؤں کے تجزیے دیکھا کر لوگوں کو گمراہ کرنے میں مصروف ہے۔

سکیورٹی حکام نے اس صورتحال میں پاکستانی عوام سے اپیل کی ہے کہ وہ سوشل میڈیا پر پھیلائے جانے والے گمراہ کن اور من گھڑت پروپیگنڈا کی بجائے مستند ذرائع سے دی جانے والی معلومات پر اکتفا کریں۔