ملک میں ہیٹ ویو کا خدشہ، پی ڈی ایم اے نے الرٹ جاری کر دیا

کراچی: محکمہ موسمیات نے ہیٹ ویو الرٹ جاری کرتے ہوئے کہا ہے کہ درجہ حرارت معمول سے 4 سے 7 ڈگری سینٹی گریڈ زیادہ رہنے کا امکان ہے۔

محکمہ موسمیات کے مطابق سندھ، پنجاب اور بلوچستان کے مختلف علاقوں میں شدید گرمی پھیل گئی ہے، جہاں سبی اور دادو میں درجہ حرارت 45 ڈگری تک پہنچ چکا ہے۔ سکھر، لاڑکانہ میں 44 اور نوابشاہ میں 43 ڈگری ریکارڈ کیا گیا، جبکہ ملتان، بہاولپور اور ڈی جی خان میں 41 ڈگری تک درجہ حرارت پہنچا۔

آج سے 11 اپریل تک جنوبی پاکستان میں ہیٹ ویو کی صورتحال اور شمالی علاقوں میں بارشوں کی پیشگوئی کی گئی ہے۔ محکمہ موسمیات کا کہنا ہے کہ سندھ، وسطی جنوبی پنجاب اور بلوچستان کے کچھ حصوں میں درجہ حرارت 4 سے 7 ڈگری سینٹی گریڈ زیادہ رہے گا۔

سبی، دادو، نوابشاہ میں درجہ حرارت 48، سکھر اور تربت میں 46، اور بہاولپور، ڈیرہ غازی خان میں 43 ڈگری تک جا سکتا ہے۔ ملتان میں 42، ساہیوال اور سرگودھا میں 41 اور لاہور میں 40 ڈگری تک درجہ حرارت رہنے کی توقع ہے۔

کراچی سمیت سندھ میں بارش کا کوئی امکان نہیں ہے، اور شہر میں اس سال اپریل میں درجہ حرارت گزشتہ سال کی نسبت 4.4 ڈگری زیادہ ریکارڈ کیا گیا ہے۔

موسم کا حال بتانے والوں کا کہنا ہے کہ اپریل کا اوسط درجہ حرارت 34.7 ڈگری ہوتا ہے، جبکہ 14 اپریل 1947 کو درجہ حرارت 44 ڈگری تک پہنچا تھا۔

محکمہ موسمیات نے بتایا کہ اپریل، مئی اور جون میں ملک کے بیشتر علاقوں میں معمول کے مطابق بارشوں کا امکان ہے۔ اس کے علاوہ مغربی ہواؤں کا سسٹم آج رات بالائی علاقوں میں داخل ہوگا، جو اسلام آباد، بالائی پنجاب، کے پی، گلگت بلتستان اور کشمیر میں بارش اور گرد آلود ہوائیں لے کر آئے گا۔