ملک کی آئی ٹی برآمدات تاریخ کی بلند ترین سطح پر پہنچ گئیں

ایس آئی ایف سی کی معاونت سے مارچ 2025 میں ملکی آئی ٹی برآمدات 342 ملین ڈالر کی ریکارڈ سطح پر پہنچ گئیں، جو اب تک کی سب سے زیادہ ہیں۔ یہ مسلسل 18 واں مہینہ ہے جس میں آئی ٹی برآمدات میں اضافہ ریکارڈ کیا گیا۔

مالی سال 2025 کے پہلے 9 ماہ میں آئی ٹی برآمدات 2.8 ارب ڈالر تک پہنچ چکی ہیں، جبکہ پاکستانی آئی ٹی کمپنیوں کی عالمی سطح پر موجودگی میں بھی نمایاں اضافہ ہوا ہے۔

اُڑان پاکستان حکمت عملی کے تحت حکومت نے برآمدات کا ہدف 10 ارب ڈالر مقرر کر رکھا ہے۔ حکومتی پالیسیوں اور روپے میں استحکام بھی اس اضافے کا سبب بنے ہیں۔

دو ماہ قبل بھی آئی ٹی برآمدات میں 28 فیصد اضافہ ریکارڈ ہوا تھا، اور وزیر مملکت شزا فاطمہ خواجہ کے مطابق مستقبل میں اس میں مزید بہتری کی توقع ہے۔