امریکی عدالت کا گوگل کیخلاف بڑا فیصلہ

امریکی فیڈرل جج نے گوگل کو سرچ انجن مارکیٹ میں غیر قانونی اجارہ داری قائم کرنے کا مرتکب قرار دے دیا۔

عدالت کے مطابق گوگل نے ڈیفالٹ سرچ انجن بننے کیلئے اربوں ڈالر خرچ کیے اور مسابقتی عمل کو نقصان پہنچایا۔ امریکی محکمہ انصاف نے گوگل سے اپنا ایڈ مینیجر سسٹم فروخت کرنے کا بھی مطالبہ کیا ہے۔ اس فیصلے کو ٹیکنالوجی ماہرین گوگل کے خلاف عدم اعتماد کے مقدمے میں بڑی پیش رفت قرار دے رہے ہیں۔

فیصلے میں کہا گیا ہے کہ گوگل نے اشاعتی صارفین، اوپن ویب کے صارفین اور مسابقت کو نقصان پہنچایا، جبکہ معلومات چھپا کر اپنے غیر قانونی طرزِ عمل کو پوشیدہ رکھا۔

امریکی اٹارنی جنرل پامیلا بونڈی نے اسے "ڈیجیٹل دنیا میں اجارہ داری کے خلاف تاریخی فتح” قرار دیا، جبکہ محکمہ انصاف کے اسسٹنٹ اٹارنی جنرل ابی گیل اسلیٹر نے کہا کہ گوگل کا غلبہ امریکی آوازوں کو دبانے اور کنٹرول کرنے کا سبب بن رہا ہے۔

گوگل نے فیصلے کے خلاف اپیل کا اعلان کیا ہے۔ کمپنی کا مؤقف ہے کہ پبلشرز متعدد متبادل کے باوجود گوگل کا انتخاب اس کی سادگی، کم قیمت اور مؤثریت کی وجہ سے کرتے ہیں۔