چینی کی قلت: شوگر ایڈوائزری بورڈ نے 5 لاکھ ٹن چینی درآمد کرنے کی منظوری دیدی

اسلام آباد: وفاقی وزیر برائے غذائی تحفظ رانا تنویر حسین کی زیر صدارت شوگر ایڈوائزری بورڈ کے اجلاس میں 5 لاکھ ٹن چینی درآمد کرنے کی منظوری دے دی گئی۔

اعلامیے کے مطابق، چینی کی قیمتوں میں اضافے کی بڑی وجہ شوگر مل مالکان کی من مانیاں قرار دی گئیں، جب کہ قیمتوں اور فراہمی پر قابو پانے کے لیے سخت مانیٹرنگ کا فیصلہ کیا گیا ہے۔

وفاقی وزیر کا کہنا تھا کہ درآمدی چینی سے متعلق رسمی کارروائیاں چند روز میں مکمل کر لی جائیں گی، اور چینی کو جلد مارکیٹ میں لایا جائے گا تاکہ عوام کو ریلیف فراہم کیا جا سکے۔

انہوں نے مزید کہا کہ ملک میں چینی کی سپلائی میں کمی کے پیش نظر درآمد کا فیصلہ ناگزیر تھا، اور اس پر فوری عملدرآمد جاری ہے۔