پاکستان نے پہلے ٹی 20 میں ویسٹ انڈیز کو 14 رنز سے شکست

پاکستان نے ویسٹ انڈیز کے خلاف تین میچوں کی ٹی ٹوئنٹی سیریز کے پہلے میچ میں 14 رنز سے کامیابی حاصل کی۔ یہ میچ امریکی ریاست فلوریڈا کے شہر لاوڈرہل میں کھیلا گیا۔ ویسٹ انڈیز کے کپتان شائے ہوپ نے ٹاس جیت کر پہلے فیلڈنگ کا فیصلہ کیا۔

پاکستان نے 20 اوورز میں چھ وکٹوں کے نقصان پر 178 رنز بنائے۔ صائم ایوب 57 رنز کے ساتھ نمایاں رہے، جب کہ فخر زمان نے 28 اور حسن نواز نے 24 رنز بنائے۔ فہیم اشرف نے 16، صاحبزادہ فرحان نے 14 رنز اسکور کیے، جبکہ کپتان سلمان علی آغا اور محمد حارث ناٹ آؤٹ رہے۔

ویسٹ انڈیز کی ٹیم ہدف کے تعاقب میں 164 رنز بنا سکی اور سات کھلاڑی آؤٹ ہوئے۔ جونسن چارلس اور جیوئل اینڈریو نے 35، 35 رنز بنائے جب کہ جیسن ہولڈر نے 30 رنز کی اننگز کھیلی۔ پاکستان کی جانب سے محمد نواز نے تین اور صائم ایوب نے دو وکٹیں حاصل کیں۔

صائم ایوب کو شاندار آل راؤنڈ کارکردگی پر میچ کا بہترین کھلاڑی قرار دیا گیا۔ انہوں نے 57 رنز کے ساتھ دو وکٹیں بھی حاصل کیں۔ میچ کے بعد گفتگو کرتے ہوئے صائم نے کہا کہ وہ ہمیشہ ٹیم کی دی گئی ذمہ داری پوری کرنے کی کوشش کرتے ہیں۔

واضح رہے کہ دونوں ٹیموں کے درمیان اب تک 21 ٹی ٹوئنٹی میچز ہو چکے ہیں۔ پاکستان نے ان میں سے 15 جیتے، ویسٹ انڈیز نے 3 میں کامیابی حاصل کی، جب کہ 3 میچز بغیر نتیجے ختم ہوئے۔ اس فتح کے بعد پاکستان کو سیریز میں 1-0 کی برتری حاصل ہو گئی ہے۔