کراچی پورٹ سے ماحول دوست میرین فیول کی پہلی بڑے پیمانے پر پیداوار اور ترسیل کا آغاز

کراچی: پاکستان میں بحری شعبے میں ایک اہم سنگ میل طے کرتے ہوئے کراچی پورٹ سے ماحول دوست میرین فیول کی پہلی بڑے پیمانے پر پیداوار اور ترسیل کا آغاز ہوگیا ہے۔ یہ پیشرفت بین الاقوامی معیار کے مطابق انتہائی کم سلفر فیول آئل (VLSFO) کی پیداوار اور باقاعدہ ترسیل کے آغاز کے طور پر ریکارڈ کی گئی ہے۔

اس تاریخی کامیابی کے ذریعے پاکستان نے پہلی بار بین الاقوامی تنظیم برائے بحری امور (IMO) کے معیار کو پورا کیا ہے۔ وِٹول کی سنگاپور کی بنکر بارج کے ذریعے 8,722 میٹرک ٹن ماحول دوست فیول کی کامیاب ترسیل کی گئی، جس نے ملکی توانائی کے شعبے میں اہم سنگ میل عبور کیا۔

ماہرین کے مطابق یہ اقدام پاکستان کی توانائی کی پیداوار میں ماحول دوست ٹیکنالوجی کے استعمال کی جانب ایک بڑی پیشرفت ہے۔ VLSFO فیول ماحول کو کم نقصان پہنچانے والا ہے اور عالمی بحری معیار کے مطابق قابل قبول سمجھا جاتا ہے۔

وزیرِ اعظم کی ٹاسک فورس برائے بحری امور اور حکومت کے دیگر متعلقہ اداروں کی مربوط کوششوں نے اس کامیابی کو ممکن بنایا۔ اس منصوبے کے تحت مقامی سطح پر ماحول دوست میرین ایندھن کی پیداوار اور ترسیل کا مستقل نظام قائم کیا گیا ہے۔

قبل ازیں، وِٹول نے بحری شعبے میں تعاون کے دیگر مواقع کا بھی جائزہ لیا، جن میں بارج آپریشنز اور دیگر لاجسٹک سہولیات شامل تھیں، تاکہ ترسیل کا عمل مؤثر اور محفوظ بنایا جا سکے۔

اس اقدام سے نہ صرف پاکستان کی توانائی کی صنعت کو فروغ ملے گا بلکہ بین الاقوامی معیار کے مطابق ماحول دوست ایندھن کی پیداوار میں ملک کی خود کفالت کو بھی یقینی بنایا جائے گا۔