لاہور: 9 مئی کے مقدمات میں ملوث 104 ملزمان کی عبوری ضمانتوں میں توسیع

لاہور: لاہور کی انسداد دہشت گردی عدالت نے 9 مئی کے مقدمات میں ملوث 104 ملزمان کی عبوری ضمانتوں میں توسیع کر دی ہے۔

آج لاہور کی انسداد دہشت گردی عدالت میں 9 مئی کے مقدمات کی سماعت ہوئی، جس میں جج ارشد جاوید نے عبوری ضمانت کی درخواستوں پر سماعت کی۔

سماعت کے دوران فواد چودھری اور اسد عمر عدالت میں پیش ہوئے، جبکہ شاہ محمود قریشی اور اعظم سواتی کے جیل وارنٹ پیش کیے گئے۔ مزید برآں، علیمہ خان اور عظمیٰ خان کی حاضری معافی کی درخواستیں بھی دائر کی گئیں۔ درخواست میں کہا گیا کہ علیمہ خان اور عظمیٰ خان بانی پی ٹی آئی سے ملنے کے لیے اڈیالہ جیل گئی ہیں، اور آج عمران خان سے فیملی کی ملاقات کا دن ہے، لہٰذا ان کی حاضری معاف کی جائے۔

عدالت نے درخواستوں پر غور کرنے کے بعد علیمہ خان، عظمیٰ خان، اسد عمر، عمر ایوب، فواد چودھری سمیت 104 ملزمان کی عبوری ضمانتوں میں 12 فروری تک توسیع کر دی۔