آرمی چیف نے عید سرحد پر تعینات آفسران اور جوانوں کے ساتھ منائی

اسلام آباد: چیف آف آرمی اسٹاف جنرل سید عاصم منیر نے عید سرحد پر تعینات آفسران اور جوانوں کے ساتھ منائی۔ سپہ سالار نے جوانوں کو عید کی مبارکباد دی اور ان کی بے لوث خدمات اور غیر متزلزل عزم کو سراہا۔

آئی ایس پی آر کے مطابق آرمی چیف نے عید الفطر کے موقع پر جنوبی وزیرستان کے علاقے وانا ، ڈیرہ اسماعیل خان کے علاقہ چکّن کا دورہ کیا۔ سپہ سالار نے مغربی سرحد پر عید کی نماز ادا کی اور پاکستان کے پائیدار استحکام اور خوشحالی کیلئے دعا کی۔

سپہ سالار نے جوانوں کو عید کی مبارکباد دی اور ان کی بے لوث خدمات اور غیر متزلزل عزم کو سراہا۔ ان کا کہنا تھا کہ آپ کی وابستگی اور قربانیاں نہ صرف ہمارے وطن کے تحفظ کی ضمانت ہیں بلکہ پاکستان سے آپ کی گہری محبت کی بھی عکاسی کرتی ہیں۔

آرمی چیف نے مسلح افواج، قانون نافذ کرنے والے اداروں اور خیبر پختونخوا کے بہادر عوام کی کارکردگی کو سراہتے ہوئے کہا کہ وہ ہمیشہ دہشت گردی کے خلاف ثابت قدم رہے ہیں۔

آرمی چیف نے شہداء کی قربانیوں کو خراجِ عقیدت پیش کرتے ہوئے کہا کہ امن و استحکام کے قیام کیلئے ان کی جدوجہد ہی ہماری کامیابی کی بنیاد ہے۔