ہالی وڈ کی معروف اداکارہ کا اداکاری کو خیرباد کہنے کا اعلان

ہالی وڈ کی ممتاز اداکارہ کیٹ بلانچیٹ نے انکشاف کیا ہے کہ وہ اداکاری کو خیرباد کہنے پر سنجیدگی سے غور کر رہی ہیں تاکہ زندگی کے دیگر پہلوؤں کو دریافت کر سکیں۔

ایک حالیہ انٹرویو میں ان کا کہنا تھا کہ اب میں خود کو اداکارہ کہلانا پسند نہیں کرتی، کیونکہ میں اداکاری چھوڑنے کا فیصلہ کر چکی ہوں۔ انہوں نے کہا کہ جب وہ یہ بات گھر میں کرتی ہیں تو سب حیران ہو جاتے ہیں، لیکن وہ واقعی کچھ نیا اور مختلف کرنا چاہتی ہیں۔

کیٹ بلانچیٹ اپنے کیرئیر میں دو بار آسکر ایوارڈ جیت چکی ہیں۔ پہلی بار 2005 میں The Aviator کیلئے بہترین معاون اداکارہ جبکہ دوسری بار 2014 میں Blue Jasmine کیلئے بہترین اداکارہ کا ایوارڈ اپنے نام کیا۔

ان کی حالیہ فلم "بلیگ بیگ” مارچ 2025 میں ریلیز ہوئی، جبکہ نئی فلم "فادر، مدر، سسٹر، برادر” کی شوٹنگ مکمل ہو چکی ہے اور وہ آئندہ سال نمائش کیلئے پیش کی جائے گی۔

اگرچہ وہ اب بھی کچھ فلمی منصوبوں میں مصروف ہیں، مگر انہوں نے اعتراف کیا کہ شہرت، کامیابی اور طویل کیرئیر کے باوجود وہ خود کو اندر سے مطمئن محسوس نہیں کرتیں۔