امریکا کا خلیجی ملک پر بڑا حملہ، درجنوں جاں بحق

یمن میں امریکی فضائی حملہ، راس عیسیٰ بندرگاہ پر 38 افراد جاں بحق، 100 سے زائد زخمی

 یمن کے مغربی علاقے میں واقع راس عیسیٰ کی تیل بردار بندرگاہ پر امریکی فضائیہ کے حملے میں کم از کم 38 افراد جاں بحق اور 100 سے زائد زخمی ہو گئے ہیں۔ یہ اطلاعات مقامی ذرائع اور حوثی حکام کی جانب سے سامنے آئی ہیں۔

حوثی وزارت صحت کے ترجمان کے مطابق حملے کا نشانہ بندرگاہ پر کام کرنے والے ملازمین بنے، جن میں سے 38 افراد شہید جبکہ 102 زخمی ہو گئے۔

امریکی سینٹرل کمانڈ (CENTCOM) نے ایکس (سابقہ ٹوئٹر) پر جاری بیان میں حملے کی تصدیق کی ہے۔ بیان کے مطابق یہ کارروائی حوثی گروپ کی ایندھن کی سپلائی کو روکنے اور ان کے مالی وسائل کو محدود کرنے کے لیے کی گئی۔

بیان میں مزید کہا گیا کہ "یہ حملہ حوثیوں کے اقتصادی وسائل کو نشانہ بنانے کے لیے کیا گیا تھا، نہ کہ یمن کے عام شہریوں کو نقصان پہنچانے کے لیے۔”

یہ حملہ ایسے وقت میں ہوا ہے جب امریکی افواج کی جانب سے حوثیوں کے زیر کنٹرول علاقوں میں مسلسل فضائی کارروائیاں جاری ہیں، جو روزانہ کی بنیاد پر دیکھی جا رہی ہیں۔