اپنی بیوی کی سابقہ محبت پر اعتراض نہیں: نیئر اعجاز

معروف اداکار نیئر اعجاز نے حال ہی میں ایک انٹرویو میں مردوں کے اس رویے پر کھل کر بات کی ہے جو اپنی بیویوں کے سامنے اپنے ماضی کی محبتوں کا ذکر کرتے ہیں۔ انہوں نے کہا کہ یہ عمل بیوی کی دل آزاری اور بے احترامی کے مترادف ہے، اور ایک باشعور شوہر کو ایسی باتوں سے گریز کرنا چاہیے۔

نیئر اعجاز نے خود کو خوشگوار شادی شدہ زندگی گزارنے والا شخص قرار دیتے ہوئے کہا کہ وہ کبھی بھی اپنی ماضی کی کسی بات کو اپنی بیوی یا قریبی لوگوں کے سامنے نہیں لاتے۔ ان کا کہنا تھا کہ جب آپ کے گھر میں ایک ایسی خاتون موجود ہو جو آپ کا بے حد خیال رکھتی ہو، تو بطور شوہر آپ پر بھی لازم ہے کہ اس کا احترام کریں اور جذبات کا خیال رکھیں۔

انہوں نے مزید کہا کہ اگر انہیں کبھی یہ معلوم بھی ہو جائے کہ ان کی بیوی نے ماضی میں کسی سے محبت کی تھی تو انہیں کوئی اعتراض نہیں ہوگا، کیونکہ عورت بھی محبت کرنے کی صلاحیت رکھتی ہے۔

نیئر اعجاز نے کہا کہ وہ ہمیشہ کوشش کرتے ہیں کہ ان کی کوئی بات یا عمل ان کی بیوی کو تکلیف نہ پہنچائے۔