بنو: خیبرپختونخوا پولیس نے دہشت گردوں کا حملہ ناکام بنا دیا

خیبرپختونخوا پولیس نے بنوں کے علاقے دھڑے پل پر قائم پولیس چوکی پر دہشت گردوں کے حملے کو بروقت کارروائی کرتے ہوئے ناکام بنا دیا۔

مرکزی پولیس دفتر (CPO) کے مطابق، پولیس اہلکاروں کی فوری اور مؤثر جوابی کارروائی کے باعث حملہ آور اپنے منصوبے میں کامیاب نہ ہو سکے اور فرار ہونے پر مجبور ہو گئے۔

رپورٹ کے مطابق 18 سے 19 دہشت گردوں کے گروہ نے پولیس چوکی پر حملے کی کوشش کی۔ حملہ آوروں میں سے کچھ آٹھ موٹر سائیکلوں پر سوار تھے جبکہ دیگر رینگتے ہوئے چوکی کے قریب پہنچنے کی کوشش کر رہے تھے۔

حملہ آوروں کا تعلق شدت پسند گروہ "فتنہ الخوارج” سے بتایا جاتا ہے، جن کا ہدف پولیس چوکی پر نصب آئی ٹی کیمرا تھا۔ انہوں نے مختلف سمتوں سے فائرنگ شروع کی تاکہ چوکی پر قابض ہو سکیں۔

پولیس کی بھرپور جوابی فائرنگ سے دہشت گرد پسپا ہو گئے اور کوئی جانی یا مالی نقصان نہیں ہوا۔

یہ واقعہ ایسے وقت میں پیش آیا ہے جب سیکیورٹی فورسز ملک میں امن و امان کی صورتحال بہتر بنانے کے لیے مسلسل متحرک ہیں۔ یاد رہے کہ حالیہ دنوں میں پاک فوج نے بھی بلوچستان میں غیر ملکی حمایت یافتہ عناصر کے مذموم عزائم کو ناکام بنانے کے عزم کا اعادہ کیا ہے۔