بھارتی حکام نے بھی اپنے طیارے گرنے کا اعتراف کرلیا

طاقتور جواب میں پاکستان ایئر فورس (پی اے ایف) نے پانچ بھارتی طیارے مار گرائے، جن میں تین رافیل جیٹ، ایک میگ-29 اور ایک ایس یو-30 سوخوی شامل ہیں۔ یہ طیارے مبینہ طور پر بھٹنڈہ، اکھنور اور اونتی پورہ کے علاقوں میں گر کر تباہ ہوئے۔

پی اے ایف نے برنالہ سیکٹر میں بھارتی ڈرون کو بھی کامیابی سے نشانہ بنا کر تباہ کر دیا۔ بین الاقوامی خبر رساں ایجنسی رائٹرز نے بھارتی طیاروں کی تباہی کی تصدیق کی ہے جبکہ بھارتی حکام نے بھی ان نقصانات کو تسلیم کیا ہے۔

بھارتی صحافی پراتک سنگھ محل نے تصدیق کی کہ ایک بھارتی فوجی طیارہ بھٹنڈہ میں گر کر تباہ ہوا۔ محل کے مطابق حادثے میں ایک ورکر جاں بحق اور نو افراد زخمی ہوئے۔ طیارہ رات دو بجے کے قریب گرا، جو ایک رہائشی علاقے سے تقریباً 500 میٹر کے فاصلے پر واقع گندم کے کھیت میں جا گرا۔ مقامی ذرائع کے مطابق حادثے کے بعد ہونے والے دھماکے کی آواز دور دور تک سنی گئی۔ حکام نے تاحال تباہ شدہ طیارے کی شناخت سے متعلق مزید معلومات فراہم نہیں کیں۔

مار گرائے گئے بھارتی جنگی طیاروں کی ویڈیوز بھی منظر عام پر آ گئی ہیں، جن میں نقصانات کی شدت دیکھی جا سکتی ہے۔