بھارتی ہائی کمیشن کا ایک اہلکار پاکستان میں جاسوسی کرتے ہوئے پکڑا گیا

اسلام آباد میں بھارتی ہائی کمیشن کے ایک اہلکار کو جاسوسی کے الزام میں پاکستان سے ملک بدر کر دیا گیا ہے۔ شَنکر ریڈی چندالا، جو بھارتی ہائی کمیشن میں تعینات تھے، پر سفارتی ذمہ داریوں کی آڑ میں جاسوسی کرنے کا الزام عائد کیا گیا ہے۔

پاکستانی حکام کے مطابق شَنکر ریڈی کی سرگرمیاں سفارتی آداب اور بین الاقوامی قوانین کے برخلاف تھیں، جس پر فوری کارروائی کرتے ہوئے انہیں "ناپسندیدہ شخص” (persona non grata) قرار دے دیا گیا۔

حکام نے انہیں 24 گھنٹوں کے اندر ملک چھوڑنے کا حکم دیا ہے۔ توقع کی جا رہی ہے کہ وہ آج ہی اپنے اہلِ خانہ کے ہمراہ وطن واپس روانہ ہو جائیں گے۔

اس واقعے سے بھارت اور پاکستان کے درمیان پہلے سے کشیدہ سفارتی تعلقات میں مزید تناؤ آنے کا خدشہ ہے۔ بھارتی حکومت کی جانب سے تاحال کوئی باضابطہ ردعمل سامنے نہیں آیا۔