بھارت کو رافیل طیاروں پر بڑا ناز تھا جسے شاہینوں نے خاک میں ملا دیا، وزیر اعظم

اسلام آباد: وزیر اعظم شہباز شریف نے کہا کہ بھارت کو رافیل طیاروں پر بڑا ناز تھا جسے شاہینوں نے خاک میں ملا دیا۔

قومی اسمبلی سے خطاب کرتے ہوئے وزیر اعظم نے کہا کہ بھارت نے 80 طیاروں سے حملے کیا لیکن ہمارے عقابوں نے پلک جھپکتے 3 رافیل سمیت 5 بھارتی طیارے مار گرائے۔ ہماری افواج 24 گھنٹے تیار تھی کہ کب دشمن کے جہاز آئیں اور انہیں سمندر میں پھینک دیں۔ بھارت نے آزاد کشمیر میں 2 اور پنجاب میں 4 مقامات پر حملہ کیا۔ انہوں نے کہا کہ پوری قوم کو مبارکباد دیتا ہوں خاص طور پر پاک فضائیہ کے پائیلٹ کو سلام پیش کرتا ہوں۔

شہباز شریف نے کہا کہ پاکستان روایتی جنگ میں بھارت سے بہت آگے ہے۔ پاک فوج نے رات کو ہندوستان کے ہوش ٹھکانے لگا دئیے۔ پاک فضائیہ نے بھارتی طیاروں کو پاکستانی فضائی حدود میں داخل نہیں ہونے دیا۔ ہمارے دشمن کو کل رات نیند نہیں آئی۔ انہوں نے کہا کہ میں ، صدر اور سپہ سالار شہدا کی نماز جنازہ میں شرکت کریں گے۔

وزیر اعظم نے کہا کہ پی ٹی آئی کو کہتا ہوں آؤ مل کر پاکستان کو عظیم بنائیں۔ آئیں بیٹھیں اور دنیا کو دکھائیں کہ ہم ایک ہیں۔