بھارت کی جانب سے بھیجے گئے ڈرونز اسرائیل کے نکلے

پاکستان کے خلاف بھارتی اور اسرائیلی گٹھ جوڑ کا پردہ چاک ہو گیا ہے، جب یہ انکشاف ہوا کہ بھارت نے اپنے حملوں میں اسرائیلی ساختہ ڈرون استعمال کیے۔ سیکیورٹی ذرائع کے مطابق راولپنڈی، لاہور، کراچی، گوجرانوالہ، چکوال، اٹک، بہاولپور، میانو، چھور سمیت 12 مختلف مقامات پر یہ ڈرون حملے کیے گئے۔

ان حملوں کے نتیجے میں ایک شہری جاں بحق جبکہ 4 فوجی اہلکاروں سمیت 5 افراد زخمی ہوئے۔ لاہور میں ایک ڈرون فوجی تنصیبات کے قریب گرا، جس سے متعدد افراد زخمی ہوئے، جن میں ایک فوجی کی حالت تشویشناک بتائی جا رہی ہے۔

ترجمان پاک فوج کا کہنا ہے کہ بھارت کی جانب سے ڈرون بھیجنا کھلی جارحیت ہے اور اس کا منہ توڑ جواب دیا جائے گا۔ پاک فوج نے کئی بھارتی ڈرون مار گرائے ہیں اور صورتحال پر مسلسل نظر رکھی جا رہی ہے۔