بھارت کے پاس پانی روکنے یا رخ موڑنے کی صلاحیت نہیں، ششی تھرور کا اعتراف

نئی دہلی: بھارتی اپوزیشن جماعت کانگریس کے سینئر رہنما ششی تھرور نے اعتراف کیا ہے کہ بھارت کے پاس نہ تو پانی ذخیرہ کرنے کی صلاحیت ہے اور نہ ہی دریاؤں کا رخ موڑنے کی ٹیکنالوجی موجود ہے۔

اپنے بیان میں انہوں نے واضح کیا کہ سندھ طاس معاہدہ منسوخ نہیں بلکہ صرف معطل کیا گیا ہے، اور اس سے پاکستان کو فوری طور پر پانی کی فراہمی بند نہیں ہوگی۔ ہم یہ نہیں کہہ سکتے کہ کل سے پاکستان کو پانی نہیں ملے گا، کیونکہ یہ ممکن ہی نہیں ہے۔

ان کا مزید کہنا تھا کہ یہ معطلی محض علامتی ہے، کیونکہ بھارت خود اس پانی کو سنبھالنے کی صلاحیت نہیں رکھتا۔ ہم بھارت کو ڈبو تو نہیں سکتے۔

ششی تھرور نے پہلگام واقعہ پر انٹیلی جنس ناکامی کا اعتراف بھی کیا اور کہا کہ اصل سوال یہ ہے کہ پہلے واقعے کی تحقیقات کی جائے یا فوراً ردِعمل دیا جائے۔