جنگی صورتحال کے خدشات،کس صوبے میں فوری سائرن لگانے کا فیصلہ؟

پاکستان اور بھارت کے درمیان حالیہ کشیدگی کے تناظر میں خیبر پختونخوا حکومت نے اہم حفاظتی اقدام اٹھاتے ہوئے صوبے کے تمام اضلاع میں ایمرجنسی سائرن نصب کرنے کا فیصلہ کیا ہے۔

یہ فیصلہ بھارت کی مسلسل اشتعال انگیزی اور سیکیورٹی خدشات کے پیش نظر کیا گیا ہے۔ ڈائریکٹوریٹ آف سول ڈیفنس خیبر پختونخوا کی جانب سے جاری کردہ مراسلے میں ضلعی انتظامیہ کو ہدایت دی گئی ہے کہ شہری علاقوں، بازاروں اور دیگر اہم مقامات پر فوری طور پر جدید سائرن نصب کیے جائیں تاکہ کسی بھی ہنگامی صورتحال میں عوام کو بروقت خبردار کیا جا سکے۔

مراسلے میں واضح کیا گیا ہے کہ سائرن کا مقصد ممکنہ جنگی خطرات یا فضائی حملوں سے پہلے عوام کو الرٹ کرنا ہے۔ تمام سول ڈیفنس افسران کو سائرنز کی درست تنصیب اور مکمل فعالیت کو یقینی بنانے کی ہدایت جاری کی گئی ہے۔