حکومت نے پنجاب ایئر اور بلٹ ٹرین سے متعلق بڑی خوشخبری سنا دی

لاہور: صوبائی وزیر اطلاعات عظمیٰ بخاری نے اعلان کیا ہے کہ پنجاب میں "ایئر پنجاب” ایک سال کے اندر پروازیں شروع کرے گی، جب کہ پاکستان ریلوے کے اشتراک سے بلٹ ٹرین سروس بھی متعارف کروائی جائے گی۔

پریس کانفرنس میں عظمیٰ بخاری نے بتایا کہ ایئر لائن کے لیے 4 طیارے لیز پر لیے جائیں گے اور سروس 8 ماہ سے ایک سال کے اندر شروع ہو جائے گی۔ پنجاب حکومت پہلی بار خود اپنی ایئر لائن چلا رہی ہے۔

انہوں نے کہا کہ بلٹ ٹرین سمیت ہائی اسپیڈ اور گلاس ٹرینز کا آغاز بھی کیا جا رہا ہے، ابتدائی طور پر 6 نئے روٹس پر ٹرینیں چلائی جائیں گی، جب کہ محکمہ ریلوے کو جدید خطوط پر ری ویمپ کیا جائے گا۔

پہلگام حملے کے بعد بھارتی الزامات پر ردعمل دیتے ہوئے انہوں نے کہا کہ واقعے کی ذمہ داری قبول کرنے والا گروہ پاکستان سے تعلق نہیں رکھتا، بھارت نے ہمیشہ کی طرح پاکستان مخالف پروپیگنڈا شروع کر دیا ہے۔

انہوں نے کہا کہ بھارت نے حکومت پاکستان کا ایکس (سابقہ ٹوئٹر) اکاؤنٹ بند کروا دیا ہے اور کشمیری عوام پر مظالم میں مزید اضافہ کر دیا ہے۔