جیسے جیسے وقت گزر رہا ہے جنگ کے خطرات بڑھ رہے ہیں، خواجہ آصف

اسلام آباد: وزیر دفاع خواجہ آصف کا کہنا ہے کہ جیسے جیسے وقت گزر رہا ہے پاکستان اور بھارت کے درمیان جنگ کے خطرات بڑھ رہے ہیں۔

میڈیا سے گفتگو کرتے ہوئے وزیر دفاع نے کہا کہ ہماری طرف سے جنگ کا آغاز نہیں ہوگا مگر جنگ مسلط ہوئی تو بھرپور جواب دینگے۔ بھارت جتنی طاقت استعمال کرے گا اس سے زیادہ ہم طاقت سے جواب دیں گے۔

انہوں نے مزید کہا کہ دوست ممالک چاہتے ہیں کہ پاکستان اور بھارت میں جنگ کی صورتحال نہ بنے۔ دوست ممالک، پڑوسی ممالک اور خطے کی بڑی طاقتیں بھی ثالثی کا کردار ادا کر رہی ہیں۔ اللہ کرے ان ممالک کی کوششوں سے بھارت کو کچھ عقل آ جائے۔

خواجہ آصف نے کہا کہ بھارتی حملے کو دیکھیں گے اگر خلاف ورزی ہوئی تو جس طرح کا عمل ہو گا اسی طرح کا ردعمل دیا جائے گا۔