دشمن نے چیلنج کیا تو جواب ضرور ملے گا، فیلڈ مارشل عاصم منیر

کراچی: فیلڈ مارشل سید عاصم منیر نے واضح کیا ہے کہ پاکستان اپنی خودمختاری اور قومی مفادات کا ہر قیمت پر دفاع کرے گا، اگر دشمن نے چیلنج کیا تو نتائج کی مکمل ذمہ داری اسی پر عائد ہوگی۔

انہوں نے یہ بات پی این ایس رہبر کراچی میں پاک بحریہ کی 123ویں مڈ شپ مین اور 31ویں شارٹ سروس کمیشن کی پاسنگ آؤٹ پریڈ سے خطاب میں کہی۔ فیلڈ مارشل نے دوست ممالک کے کیڈٹس کو مبارکباد دی اور کہا کہ ترقی کے لیے عوام، حکومت اور افواج کے درمیان مضبوط ربط ناگزیر ہے۔

انہوں نے کہا کہ بھارت کی غیرذمہ دارانہ جارحیت نے پورے خطے کو خطرے میں ڈالا، مگر پاکستان اپنی سرزمین کے تحفظ کے لیے مکمل تیار ہے۔ سید عاصم منیر نے اس عزم کا اعادہ کیا کہ ملک دہشت گردی کے خلاف جنگ کو اس کے منطقی انجام تک پہنچائے گا۔

فیلڈ مارشل نے کشمیر کی حمایت کا اعادہ کرتے ہوئے کہا کہ کشمیری عوام کے حق خودارادیت کی مکمل حمایت جاری رکھیں گے، اور خطے میں پائیدار امن مسئلہ کشمیر کے حل کے بغیر ممکن نہیں۔