پاک بھارت جنگ میں رافیل کی تباہی پر فرانسیسی فوج کا پہلا ردعمل

حالیہ پاک بھارت جنگ میں پاک فضائیہ کے ہاتھوں بھارت کے سات جنگی طیارے مار گرائے گئے، جن میں تین فرانسیسی ساختہ جدید رافیل طیارے بھی شامل تھے۔

فرانسیسی فوج کے ترجمان نے پیرس میں پریس بریفنگ کے دوران کہا کہ رافیل طیاروں کی تباہی سے متعلق تفصیلات ابھی غیر یقینی ہیں اور کئی پہلوؤں کی تصدیق ہونا باقی ہے۔ انہوں نے کہا کہ فرانس اس واقعے کا بغور جائزہ لے رہا ہے اور بھارت سے براہِ راست معلومات حاصل کرنے کے لیے رابطے میں ہے۔

ترجمان کے مطابق اگر رافیل کی تباہی کی تصدیق ہوگئی تو یہ اس طیارے کی 20 سالہ سروس میں پہلا واقعہ ہوگا۔ انہوں نے کہا کہ اس لڑائی میں سینکڑوں طیارے شامل تھے اور فرانس اس تجربے سے سیکھنے کا خواہاں ہے۔

ادھر بھارتی فضائیہ نے طیارے گرنے کی تصدیق سے انکار کیا ہے، تاہم 9 مئی کو ائیر مارشل اے کے بھارتی نے ایک سوال کے جواب میں کہا کہ "نقصانات لڑائی کا حصہ ہوتے ہیں”، اور مزید تفصیلات بتانے سے گریز کیا۔

واضح رہے کہ بھارت نے 2019 میں پاکستان کے ہاتھوں دو طیارے گنوانے کے بعد فرانس سے 36 رافیل طیارے خریدے تھے، جن میں سے تین حالیہ جھڑپ میں تباہ ہو چکے ہیں۔