اسلام آباد، پنجاب اور خیبر پختونخوا میں زلزلے کے جھٹکے، کوئی جانی نقصان نہیں ہوا

اسلام آباد، پنجاب اور خیبر پختونخوا کے مختلف علاقوں میں زلزلے کے شدید جھٹکے محسوس کیے گئے۔

زلزلے کی شدت ریکٹر اسکیل پر 5.5 جبکہ زیر زمین گہرائی 12 کلومیٹر ریکارڈ کی گئی۔ زلزلے کا مرکز راولپنڈی سے 60 کلومیٹر شمال مغرب میں تھا۔

زلزلے کے جھٹکے پنجاب کے شہروں راولپنڈی، اٹک، چنیوٹ، چکوال اور میانوالی میں محسوس کیے گئے، جبکہ خیبر پختونخوا میں پشاور، مہمند، شبقدر، لکی مروت، نوشہرہ، صوابی، لوئر دیر اور مالاکنڈ میں بھی لرزہ خیزی دیکھی گئی۔

پی ڈی ایم اے پنجاب کے مطابق لاہور، فیصل آباد اور گجرات سمیت دیگر علاقوں میں بھی زلزلے کی شدت 5.5 ریکارڈ کی گئی۔ ابتدائی اطلاعات کے مطابق کسی قسم کے جانی یا مالی نقصان کی اطلاع نہیں ملی۔

ترجمان کے مطابق تمام اضلاع کی انتظامیہ عمارتوں کی جانچ میں مصروف ہے جبکہ ممکنہ آفٹر شاکس کے پیش نظر ریسکیو مشینری اور عملہ الرٹ ہے۔ شہری کسی بھی ہنگامی صورت حال میں پی ڈی ایم اے ہیلپ لائن 1129 پر اطلاع دے سکتے ہیں۔