سعودی عرب میں بس حادثہ، 5 پاکستانی عمرہ زائرین جاں بحق

سعودی عرب میں ایک افسوسناک بس حادثے میں 5 پاکستانی عمرہ زائرین جاں بحق ہو گئے، جن میں 3 خواتین شامل ہیں۔ حادثہ البدر سے مدینہ منورہ جاتے ہوئے پیش آیا جب زائرین کی بس ٹرالر سے ٹکرا گئی۔ حادثے میں کئی دیگر افراد زخمی بھی ہوئے، جن میں خواتین، بچے اور بزرگ شامل ہیں۔

ریسکیو ٹیموں نے زخمیوں اور جاں بحق افراد کو قریبی اسپتالوں میں منتقل کر دیا۔ جاں بحق تمام افراد کا تعلق پاکستان سے تھا۔

دو خواتین بہاولنگر کے گاؤں 228 نائن آر سے اور تیسری خاتون گاؤں 201 مراد کی رہائشی تھیں۔ مرد جاں بحق افراد میں ایک بزرگ گاؤں 39 تھری آر اور دوسرا ڈاہرنوالہ سے تعلق رکھتا تھا۔

قومی اسمبلی کے اسپیکر ایاز صادق اور دیگر رہنماؤں نے حادثے پر افسوس کا اظہار کیا، جاں بحق افراد کے لیے دعا کی اور سفارتخانے کو ہدایت کی کہ لواحقین کی مکمل مدد کی جائے۔