سعودی عرب میں دو غیر ملکیوں کو سزائے موت

سعودی عرب کی وزارت داخلہ نے منشیات اسمگلنگ کے سنگین الزامات پر دو غیر ملکیوں کو سزائے موت دے دی ہے۔ یہ سزائیں تبوک اور الجوف کے علاقوں میں سنائی گئیں۔

سعودی خبر رساں ادارے کے مطابق الجوف ریجن میں شامی شہری فواز البکار کو بڑی مقدار میں نشہ آور گولیاں مملکت میں اسمگل کرنے کے الزام میں گرفتار کیا گیا تھا۔ عدالت میں پیش کیے گئے شواہد اور ملزم کے اقبالِ جرم کے بعد اسے سزائے موت سنائی گئی۔

دوسری جانب تبوک ریجن میں اردنی شہری حسن علی العطون کو بھی نشہ آور گولیاں اسمگل کرنے پر گرفتار کیا گیا۔ اس کا مقدمہ انسدادِ منشیات کی خصوصی عدالت میں چلایا گیا، جہاں شواہد کی بنیاد پر اسے بھی سزائے موت دے دی گئی۔

وزارت داخلہ نے اپنے بیان میں واضح کیا ہے کہ مملکت میں منشیات کی اسمگلنگ کو ایک سنگین جرم سمجھا جاتا ہے اور ایسے جرائم کے خلاف سخت کارروائی کی جاتی ہے تاکہ معاشرے کو منشیات کے نقصانات سے محفوظ رکھا جا سکے۔