سلمان خان کی فلم "سکندر” نے 200 کروڑ روپے کا ہندسہ عبور کر لیا

بالی ووڈ کے سپراسٹار سلمان خان کی عید الفطر پر ریلیز ہونے والی فلم "سکندر” نے تمام تر تنقید کے باوجود 200 کروڑ روپے کا ہندسہ عبور کر لیا۔

عید پر سلمان خان نے اپنے مداحوں کیلئے نئی فلم ریلیز کی تھی، لیکن پچھلے کئی سالوں کی طرح اس بار بھی فلم ناقدین کی تنقید کا نشانہ بنی۔ زیادہ تر لوگوں نے سلمان خان کی ایکٹنگ اور فلم کی کہانی کو تنقید کا نشانہ بنایا ہے۔

تاہم، ان تمام تنقیدوں کے باوجود فلم "سکندر” عالمی باکس آفس پر 200 کروڑ روپے کی کمائی کرنے میں کامیاب رہی۔ فلم نے ریلیز کے 9 دنوں میں دنیا بھر سے 200.93 کروڑ بھارتی روپے کی کمائی کی ہے۔

فلم کے پروڈیوسر ساجد نڈیاڈ والا نے اس کامیابی کا اعلان اپنے انسٹاگرام پوسٹ میں کیا، جس میں بتایا گیا کہ فلم نے پیر کے دن بھارت میں 2.48 کروڑ اور بیرون ملک 1 کروڑ روپے کمائے۔

پروڈیوسر نے اپنی پوسٹ میں لکھا کہ سکندر کو اپنے جشن کا حصہ بنانے کیلئے آپ کا شکریہ، ہم آپ کی محبت کے شکر گزار ہیں۔

سلمان خان کے مداح اس بات پر خوش ہیں کہ فلم نے 10 دنوں سے پہلے ہی 200 کروڑ روپے کا سنگ میل عبور کر لیا ہے۔ سکندر نے بھارت میں 123 کروڑ اور بیرون ملک 77 کروڑ روپے کمائے ہیں۔