پاکستان نے سہ ملکی بابا گرونانک کبڈی کپ کا فائنل جیت لیا

لاہور: سہ ملکی بابا گرونانک انٹرنیشنل کبڈی کپ کے فائنل میں پاکستان ایگلز نے ایران لائنز کو 26 کے مقابلے 53 پوائنٹس سے شکست دے دی۔

بھارت کا فائنل سے دستبردار ہونے کے بعد پاکستان کا ایران کے ساتھ فائنل طے پایا تھا۔ قومی کبڈی ٹیم ایونٹ میں ناقابل شکست رہی۔

گزشتہ روز کھیلے گئے پہلے میچ میں پاکستان نے بھارت کو 26 کے مقابلے 37 پوائنٹس سے شکست دی تھی۔ دوسرے میچ میں پاکستان نے ایران کو 30 کے مقابلے میں 46 پوائنٹس سے پچھاڑ کر فائنل میں جگہ بنائی تھی۔

سہ ملکی بابا گرونانک انٹرنیشنل کبڈی کپ کا فائنل جیتنے والی ٹیم کو 20 لاکھ روپے انعام دیا گیا۔ رنر اپ کو 15 جبکہ تیسری پوزیشن حاصل کرنے والی ٹیم کو 10 لاکھ روپے انعام دیا گیا۔