شاہد آفریدی کا پہلگام واقعے پر بھارتی الزامات پر سخت ردعمل

پاکستان کرکٹ ٹیم کے سابق کپتان شاہد آفریدی نے مقبوضہ کشمیر کے علاقے پہلگام میں پیش آنے والے واقعے کے بعد بھارت کی جانب سے پاکستان پر لگائے گئے الزامات پر شدید ردعمل ظاہر کیا ہے۔

شاہد آفریدی نے کہا کہ بھارت نے بغیر کسی تحقیق کے پاکستان پر الزام عائد کیا، جو کہ انتہائی افسوسناک رویہ ہے۔ انہوں نے کہا، "واقعے کے فوراً بعد بغیر ثبوت کے پاکستان کو ذمہ دار ٹھہرانا افسوسناک ہے۔”

سابق کپتان نے مزید کہا کہ پاکستان خود دہشت گردی کا شکار ہے اور ملک میں ہونے والے دہشت گرد حملوں کے ساتھ ساتھ مقبوضہ کشمیر میں انسانی جانوں کے ضیاع پر بھی گہری تشویش کا اظہار کیا۔

شاہد آفریدی نے زور دیا کہ لڑائی سے کوئی فائدہ نہیں ہوگا اور کرکٹ کو سیاست سے الگ رکھا جانا چاہیے۔ انہوں نے کہا کہ "پاکستان اور بھارت کے درمیان سفارتی بات چیت ہی مسائل کا واحد حل ہے۔”