کس معروف بھارتی اداکارہ نے فلم میں شاہ رخ خان کی بہن بننے سے انکار کر دیا تھا؟

ممبئی: معروف فلمساز منصور خان نے انکشاف کیا ہے کہ 2000 میں ریلیز ہونے والی فلم جوش میں شاہ رخ خان کی جڑواں بہن کا کردار پہلے کاجول کو پیش کیا گیا تھا، لیکن انہوں نے یہ کردار ٹھکرا دیا تھا۔

حال ہی میں دیے گئے ایک انٹرویو میں منصور خان، جو قیامت سے قیامت تک اور جو جیتا وہی سکندر جیسے کلاسک فلموں کے خالق ہیں، نے بتایا کہ کاجول نے اسکرپٹ سن کر کہا کہ وہ شاہ رخ کی بہن نہیں، بلکہ مرکزی کردار ‘میکس’ ادا کرنا چاہتی ہیں۔

ہدایتکار کے مطابق کاجول کے انکار کے بعد ایشوریا رائے کو یہ کردار پیش کیا گیا، جنہوں نے فوری طور پر یہ رول قبول کر لیا۔ منصور خان نے ایشوریا کی پرفارمنس کو ان کے کیریئر کی بہترین اداکاری میں سے ایک قرار دیا۔

یاد رہے کہ کاجول اور شاہ رخ خان اس سے قبل دل والے دلہنیا لے جائیں گے اور کچھ کچھ ہوتا ہے جیسی سپر ہٹ فلموں میں رومانوی جوڑی کے طور پر نظر آ چکے ہیں۔