شوبز شخصیات نے بھارتی حملے کو شرمناک اور بزدلانہ اقدام قرار دیدیا

کراچی/لاہور: بھارتی حملے کے بعد پاکستانی شوبز انڈسٹری کی نمایاں شخصیات — فواد خان، ماہرہ خان، ہانیہ عامر، بلال عباس، عائزہ خان، مایا علی، اور دیگر — نے شدید مذمت کرتے ہوئے اسے "شرمناک” اور "بزدلانہ” اقدام قرار دیا ہے۔

فواد خان نے بھارتی حملے کو "شرمناک” قرار دیتے ہوئے ہوش مندی کی اپیل کی، جبکہ ماہرہ خان نے کہا کہ "نفرت اور اشتعال انگیزی بھارت کی شکست ہے، پاکستان زندہ باد!”۔ ہانیہ عامر نے بمباری سے شہید بچوں پر افسوس کا اظہار کرتے ہوئے کہا کہ "یہ حکمت عملی نہیں، ظلم ہے”۔

بلال عباس نے کہا، "معصوم شہریوں پر حملہ انسانیت کے خلاف جرم ہے”، جب کہ عائزہ خان نے انسانیت اور پاکستان کے ساتھ کھڑے ہونے کا عزم ظاہر کیا۔ درفشاں، وہاج علی، عثمان خالد بٹ، اور فرحان سعید سمیت دیگر فنکاروں نے بھی اظہارِ یکجہتی کیا۔

دوسری جانب، بھارتی میڈیا کی جانب سے پاکستانی فنکاروں پر الزامات کے بعد، بھارت نے ماہرہ خان، ہانیہ عامر، بلال عباس اور علی ظفر سمیت متعدد فنکاروں کے انسٹاگرام اکاؤنٹس محدود کر دیے ہیں۔

واضح رہے کہ بھارتی حملے میں 26 پاکستانی شہید ہوئے، جس کے جواب میں پاک فوج نے 5 بھارتی طیارے اور ایک ڈرون مار گرایا۔