صبح کی دھوپ ہڈیوں کو مضبوط اور قوتِ مدافعت بھی بڑھاتی ہے، تحقیق

ماہرین کے مطابق جسم میں وٹامن ڈی کی کمی پوری کرنے کا سب سے قدرتی اور مؤثر ذریعہ صبح کی دھوپ ہے، جو نہ صرف ہڈیوں کو مضبوط بناتی ہے بلکہ موڈ بہتر، وزن کم، اور قوتِ مدافعت بھی بڑھاتی ہے۔

بھارتی ڈاکٹر دیویا گپتا کا کہنا ہے کہ وٹامن ڈی اعصابی نظام کو بہتر بنانے، دماغی تناؤ کم کرنے اور جسمانی توانائی میں اضافہ کرنے میں مددگار ہے۔ جاپان کی اوساکا میٹروپولیٹن یونیورسٹی کے ماہرین تجویز کرتے ہیں کہ روزانہ 20 منٹ کی صبح کی دھوپ صحت کے لیے بہترین ہے۔

ماہرین کے مطابق وٹامن ڈی آنتوں میں کیلشیم جذب کرنے میں مدد دیتا ہے، جو ہڈیوں، دانتوں اور پٹھوں کو مضبوط بنانے کے لیے ضروری ہے۔ صبح کے وقت سورج کی شعاعوں سے نہ صرف جسمانی توانائی میں اضافہ ہوتا ہے بلکہ بے چینی، تھکن اور نیند کی کیفیت بھی کم ہو جاتی ہے۔