علی امین گنڈاپور و دیگر کے ناقابل ضمانت وارنٹ گرفتاری

لاہور – انسداد دہشت گردی عدالت (اے ٹی سی) نے وزیر اعلیٰ خیبر پختونخوا علی امین گنڈاپور کے خلاف ناقابلِ ضمانت وارنٹ گرفتاری جاری کر دیے ہیں۔ یہ اقدام پاکستان تحریک انصاف (پی ٹی آئی) کے 5 اکتوبر کو لاہور میں ہونے والے احتجاج کے دوران پولیس پر مبینہ تشدد کے مقدمے میں اٹھایا گیا ہے۔

اے ٹی سی ایڈمن جج منظر علی گل کی جانب سے جاری کردہ فیصلے میں پی ٹی آئی کے دیگر رہنماؤں حماد اظہر، سعید سندھو اور شہباز احمد کے بھی ناقابلِ ضمانت وارنٹ گرفتاری جاری کیے گئے ہیں۔

پولیس کے مطابق، علی امین گنڈاپور سمیت دیگر ملزمان کو تفتیش میں شامل ہونے کے لیے متعدد بار طلب کیا گیا، تاہم وہ پیش نہیں ہوئے۔ پولیس نے مؤقف اپنایا کہ ملزمان کے شاملِ تفتیش نہ ہونے پر کیس کی کارروائی متاثر ہو رہی ہے۔

عدالت نے تمام ملزمان کو فوری گرفتار کر کے پیش کرنے کا حکم دیا ہے، جبکہ قانون نافذ کرنے والے ادارے اس حوالے سے متحرک ہو چکے ہیں۔