عمران خان کسی سے کوئی ڈیل نہیں کریں گے، شندانہ گلزار

راولپنڈی:عمران خان کسی سے کوئی ڈیل نہیں کریں گے، شندانہ گلزار

پاکستان تحریک انصاف (پی ٹی آئی) کی رہنما شندانہ گلزار خان نے ہفتے کے روز کہا ہے کہ پارٹی کے بانی عمران خان کسی سے کوئی ڈیل نہیں کریں گے۔ وہ راولپنڈی میں انسداد دہشت گردی عدالت کے باہر میڈیا سے گفتگو کر رہی تھیں۔

شندانہ گلزار نے بتایا کہ ان کے خلاف دو مقدمات صرف اس بنیاد پر درج کیے گئے کہ انہوں نے پارٹی کارکنوں کے حق میں آواز بلند کی۔ ان کا کہنا تھا، "مجھے صرف اس لیے نشانہ بنایا جا رہا ہے کہ میں نے اپنے ساتھی کارکنوں کی حمایت کی۔”

اس موقع پر پی ٹی آئی کی سینئر رہنما زرتاج گل نے بھی میڈیا سے گفتگو کرتے ہوئے ان مقدمات کو جھوٹا اور بے بنیاد قرار دیا۔ ان کا مطالبہ تھا کہ ان مقدمات کو فوری طور پر ختم کیا جائے۔

عدالت میں پیشی کے بعد میڈیا سے بات کرتے ہوئے عمران خان کے وکیل فیصل ملک نے کہا کہ انہوں نے عدالت کو آگاہ کیا ہے کہ وہ مقدمے کی سماعت کے لیے مکمل طور پر تیار ہیں، اور عمران خان کو جیل منتقل کیا جائے تاکہ وہ قانونی مشاورت کر سکیں۔

فیصل ملک کا یہ بھی کہنا تھا کہ 9 مئی سے متعلق تمام مقدمات کو یکجا کرنے کے لیے عدالت میں باقاعدہ درخواست جمع کروائی گئی ہے تاکہ ان مقدمات کو مؤثر اور منصفانہ انداز میں نمٹایا جا سکے۔

یاد رہے کہ 9 مئی کے واقعات کے بعد پی ٹی آئی کے متعدد رہنماؤں اور کارکنوں کے خلاف قانونی کارروائیاں کی جا رہی ہیں، جنہیں پی ٹی آئی کی قیادت سیاسی انتقامی کارروائی قرار دیتی ہے۔