عمران خان کی پارٹی قیادت کو 10 محرم کے بعد حکومت کیخلاف تحریک چلانے کی ہدایت

اڈیالہ جیل میں قید پاکستان تحریک انصاف کے بانی عمران خان نے پارٹی قیادت کو 10 محرم کے بعد حکومت کے خلاف تحریک شروع کرنے کی ہدایت دی ہے۔ یہ بات ان کی ہمشیرہ علیمہ خان نے جیل کے باہر میڈیا سے گفتگو میں بتائی۔

علیمہ خان نے بتایا کہ عمران خان کا کہنا ہے کہ وہ جیل میں بنیادی سہولیات سے محروم ہیں، 22 گھنٹے تنہائی میں رکھتے ہیں اور کتابیں بھی نہیں دی جا رہیں۔ ملاقاتوں پر سخت پابندیاں ہیں، صرف چند منٹ کے لیے اہل خانہ اور وکلا کو اجازت دی گئی۔

سابق وزیر اعظم کی ہمشیرہ کے مطابق عمران خان نے عدلیہ کی آزادی، میڈیا پر پابندی اور آئینی ترامیم پر سخت تحفظات کا اظہار کیا ہے۔ ان کا کہنا تھا کہ عوام کا مینڈیٹ چوری کیا گیا، پارلیمنٹ میں غیر منتخب لوگ بیٹھے ہیں اور ملک کو غلامی کی طرف دھکیلا جا رہا ہے۔

بانی پی ٹی آئی نے پنجاب اسمبلی میں اپوزیشن کی مزاحمت کو سراہتے ہوئے کہا کہ اگر پابندیاں برقرار رہیں تو پارٹی ممبران اپنی "علامتی اسمبلی” قائم کریں۔ علیمہ خان کے مطابق عمران خان نے احتجاجی حکمت عملی کے لیے پارٹی قیادت کو تفصیلی ہدایات دے دی ہیں۔