بھارتی کرکٹرز کی جانب سے فحش تصاویر موصول ہوئیں، عنایہ

ممبئی: سابق بھارتی کرکٹر اور کوچ سنجے بانگر کے بیٹے، جنہوں نے جنس کی تبدیلی کے بعد عنایہ کے نام سے نئی شناخت اختیار کی، نے انکشاف کیا ہے کہ انہیں متعدد بھارتی کرکٹرز کی جانب سے فحش تصاویر موصول ہوئی ہیں۔

عنایہ، جو اب برطانیہ میں مقیم ہیں، نے ایک حالیہ انٹرویو میں بتایا کہ کرکٹ کی دنیا میں عدم تحفظ اور مردانہ ذہنیت کا غلبہ ہے۔ ان کا کہنا تھا کہ جنس کی تبدیلی کے بعد انہیں مختلف رویوں کا سامنا کرنا پڑا، جن میں جنسی ہراسانی بھی شامل ہے۔

انہوں نے کہا، "کچھ کرکٹرز نے مجھے فحش تصاویر بھیجیں، اور ایک کرکٹر تو سب کے سامنے مجھے گالیاں دیتا، لیکن بعد میں تنہائی میں تصویریں مانگتا۔”

عنایہ نے مزید کہا کہ بچپن سے ہی وہ لڑکی بننے کی خواہش رکھتی تھیں، اور اپنی شناخت کے اس سفر کو سوشل میڈیا پر شیئر کرنے کے بعد انہیں بھرپور پذیرائی ملی۔

یاد رہے، عنایہ نے نومبر 2023 میں اپنی جنس کی تبدیلی کا اعلان کیا تھا، جس کے بعد وہ خبروں میں آئی تھیں۔ اب، بھارتی کرکٹرز پر لگائے گئے ان الزامات کے بعد ایک بار پھر وہ میڈیا کی توجہ کا مرکز بن گئی ہیں۔