عوام 100 روپے میں چڑیا گھر دیکھ سکتے ہیں، قیمت میں اضافہ نہیں کیا گیا، مریم اورنگزیب

لاہور چڑیا گھر میں زائد قیمتیں وصول کرنے کی شکایات پر بات کرتے ہوئے پنجاب کی سینیئر وزیر مریم اورنگزیب نے کہا کہ عوام صرف 100 روپے میں پورا چڑیا گھر دیکھ سکتے ہیں، قیمت میں کسی قسم کا کوئی اضافہ نہیں کیا گیا۔

اپنے بیان میں انہوں نے کہا کہ چڑیا گھر کا 98 فیصد حصہ 100 روپے میں دیکھا جا سکتا ہے۔ رینگنے والے جانوروں کو دیکھنے کا ٹکٹ 200 روپے ہے۔ اسی طرح ایکویریم کا 200 روپے اور ہولوگرام کا ٹکٹ 300 روپے ہے۔ یہ نئی سہولیات ہیں جن کی قیمت الگ مقرر کی گئی ہے۔ زیادہ افراد کی آمد کی وجہ سے بعض انتظامی مسائل پیدا ہوئے، یقینی بنایا جا رہا ہے کہ مستقبل میں ایسا نہ ہو۔ ڈے جی وائلڈ لائف کو فوری چڑیا گھر پہنچنے کی ہدایت کر دی گئی ہے۔

سینیئر وزیر نے مزید کہا کہ داخلہ ٹکٹ کیلئے الگ کاؤنٹرز موجود ہیں۔ ٹکٹنگ سینٹر کے باہر ایک شکایت سیل بھی قائم ہے۔ دو سال کے بعد عید الفطر پر چڑیا گھر کھلا ہے، گزشتہ روز 35 ہزار شہری چڑیا گھر آئے جو ریکارڈ ہے۔