غزہ پر اسرائیلی حملوں کے خلاف احتجاج, لاہور کی مارکیٹیں بند!

لاہور: غزہ میں جاری اسرائیلی بربریت کے خلاف احتجاج کرتے ہوئے لاہور کی تاجر برادری نے آج (جمعرات) مکمل ہڑتال کی، جس کا مقصد مظلوم فلسطینی عوام سے یکجہتی کا اظہار کرنا ہے۔

لاہور کے اہم تجارتی مراکز بشمول ہال روڈ مارکیٹ، انارکلی بازار، اردو بازار، اعظم کلاتھ مارکیٹ اور اندرون شہر کی متعدد مارکیٹیں صبح سے بند ہیں۔ تاجر برادری کی جانب سے یہ احتجاج فلسطینیوں کے ساتھ اظہارِ ہمدردی اور اسرائیلی جارحیت کے خلاف آواز بلند کرنے کے لیے کیا گیا ہے۔

تاہم، بادامی باغ آٹو پارٹس مارکیٹ کی انتظامیہ نے اعلان کیا ہے کہ ان کی دکانیں معمول کے مطابق کھلی رہیں گی۔

ادھر پاکستان گڈز ٹرانسپورٹرز ایسوسی ایشن نے بھی ملک گیر احتجاجی کال پر لبیک کہتے ہوئے ہڑتال کا اعلان کر دیا ہے۔ ترجمان کے مطابق یہ قدم فلسطینی مسلمانوں پر ہونے والے ظلم کے خلاف اور ان کے ساتھ اظہارِ یکجہتی کے طور پر اٹھایا گیا ہے۔