لاہور میں ٹک ٹاکر آیت مریم شوہر کے ہاتھوں قتل، ملزم 24 گھنٹوں میں گرفتار

لاہور: صوبہ پنجاب کے دارالحکومت میں ایک افسوسناک واقعے میں معروف ٹک ٹاکر آیت مریم کو اس کے شوہر سعد نے جان سے مار دیا۔ واقعہ لاہور کے علاقے نواب ٹاؤن میں پیش آیا۔

پولیس کے مطابق، میاں بیوی کے درمیان کسی معمولی بات پر جھگڑا ہوا، جس کے دوران ملزم نے مبینہ طور پر اپنی بیوی کا گلا دبا کر اسے موت کے گھاٹ اتار دیا۔ واقعے کی اطلاع ملنے پر نواب ٹاؤن پولیس نے فوری کارروائی کرتے ہوئے جدید ٹیکنالوجی کی مدد سے ملزم کو 24 گھنٹے کے اندر گرفتار کر لیا۔

ایس پی صدر ڈاکٹر غیور احمد خان کا کہنا ہے کہ آیت مریم اور سعد کے درمیان اکثر گھریلو تنازعات ہوتے تھے۔ مقتولہ کے قتل کا مقدمہ درج کر لیا گیا ہے جبکہ ملزم کو مزید تفتیش کے لیے انویسٹی گیشن ونگ کے حوالے کر دیا گیا ہے۔