لاہور: کوئٹہ گلیڈی ایٹرز کے فاسٹ باؤلر محمد عامر نے پاکستان سپر لیگ (پی ایس ایل) 10 میں پشاور زلمی کے کپتان بابراعظم کو ایک بار پھر آؤٹ کرنے کے بعد میدان میں پیدا ہونے والی "لڑائی” سے متعلق اپنے خیالات کا اظہار کیا ہے۔
میچ کے بعد پریس کانفرنس میں محمد عامر نے واضح کیا کہ ان کا بابراعظم کے ساتھ کوئی ذاتی مقابلہ نہیں ہے بلکہ ایسے لمحات شائقین کے لیے دلچسپی کا باعث بنتے ہیں اور یہی ٹی ٹوئنٹی کرکٹ کی خوبصورتی ہے۔
محمد عامر نے کہا، "یہ کوئی لڑائی نہیں ہے۔ اگر آپ سوشل میڈیا دیکھیں یا میدان میں میچ کے دوران شائقین کا جوش ملاحظہ کریں تو آپ دیکھیں گے کہ لوگ ان لمحات سے لطف اندوز ہو رہے ہیں۔ آخر میں ہمارا کام مداحوں کو تفریح فراہم کرنا ہے۔”
انہوں نے مزید کہا کہ فاسٹ باؤلنگ میں جارحیت ایک فطری عمل ہے اور شائقین میدان میں باؤلرز کی شدت سے بھرپور کارکردگی کو پسند کرتے ہیں۔
عامر نے وضاحت کی، "ایک باؤلر کی حیثیت سے میرا کام بلے باز کو چیلنج کرنا اور میدان میں جارحیت دکھانا ہے، جبکہ بیٹر کا کام باؤلر کو دباؤ میں لا کر رنز بنانا ہے۔ میرے خیال میں یہ سب ہونا چاہیے لیکن ایک حد کے اندر۔ میرے فینز میری وڈیوز شیئر کرتے ہیں اور بابراعظم کے فینز ان کی، یہ سب پی ایس ایل کے لیے بہت اچھا ہے۔”
انہوں نے مزید کہا کہ ان کی اصل توجہ ہمیشہ باؤلنگ اور وکٹ کی صورتحال پر ہوتی ہے۔ "میں صرف بیٹر پر فوکس نہیں کرتا بلکہ وکٹ کا معائنہ کرتا ہوں اور اسی کے مطابق اپنی حکمت عملی بناتا ہوں تاکہ کامیابی کے امکانات بڑھ سکیں۔”
محمد عامر کا کہنا تھا کہ میدان میں جوش و خروش فاسٹ باؤلنگ کی خوبصورتی ہے اور یہ شائقین کے لیے کھیل کو مزید دلچسپ بناتا ہے۔
