خیبر پختونخوا حکومت کی سرکاری ملازمین کی پروموشن پالیسی میں ترمیم

پشاور: خیبر پختونخوا حکومت نے سرکاری ملازمین کی پروموشن پالیسی میں ترمیم کی منظوری دے دی ہے، جس کے تحت اب ڈیپوٹیشن پر آنے والے ملازمین اپنی رضامندی سے ترقی کے اہل ہوں گے۔

اسٹبلشمنٹ ڈیپارٹمنٹ کی جانب سے جاری کردہ اعلامیے میں بتایا گیا ہے کہ ترمیم سول سرونٹ پروموشن پالیسی کے سیریل نمبر 4 کلاز ڈی میں کی گئی ہے۔ نوٹیفکیشن میں کہا گیا کہ نظرثانی شدہ پالیسی کے مطابق ڈیپوٹیشن پر آنے والے سرکاری ملازمین اپنی رضامندی سے ترقی حاصل کر سکیں گے۔

اعلامیے میں مزید وضاحت دی گئی ہے کہ ڈیپوٹیشن پر ترقی کی صورت میں ملازمین کو اپنے اصل محکمہ میں واپس آنا ہوگا، اور اس واپسی سے ان کی سینیارٹی پر کوئی اثر نہیں پڑے گا۔

قبل ازیں وزیراعظم شہباز شریف نے سرکاری ملازمین کو اپنی صلاحیتوں کو بروئے کار لاتے ہوئے ملک و قوم کی خدمت کی ترغیب دی تھی، اور ان سے امید ظاہر کی تھی کہ وہ موجودہ بحرانوں سے نمٹنے کی صلاحیت رکھتے ہیں۔ وزیراعظم نے پروبیشنری افسران کو یاد دلایا کہ عملی زندگی میں انہیں عوامی مسائل اور ترقی کے راستے میں درپیش مشکلات کا سامنا کرنا پڑے گا۔