اینٹی نارکوٹکس فورس (اے این ایف) نے 2 ارب 30 کروڑ روپے سے زائد مالیت کی منشیات اسمگل کرنے کی کوشش ناکام بنا دی۔
اے این ایف، پاک بحریہ اور میری ٹائم سکیورٹی کے مشترکہ آپریشن میں بحیرہ عرب کے کھلے سمندر میں 1 ہزار کلو سے زائد منشیات برآمد کی گئیں۔ ترجمان اے این ایف کے مطابق، سی فرنٹ ٹاسک فورس نے مشتبہ جہاز کو روکا، جس سے 1 ہزار کلو سے زائد منشیات برآمد ہوئیں۔ بین الاقوامی مارکیٹ میں ان منشیات کی مالیت 2 ارب 30 کروڑ روپے ہے۔
اے این ایف کے مطابق، یہ منشیات بین الاقوامی سطح پر سپلائی کی جانی تھیں، تاہم بروقت انٹیلیجنس شیئرنگ کی بدولت آپریشن کامیاب رہا۔ ضبط کی گئی منشیات مزید کارروائی کے لیے فورس کے حوالے کر دی گئی ہیں۔
20 مارچ کو اے این ایف نے مختلف شہروں اور تعلیمی اداروں میں منشیات اسمگلنگ کے خلاف کریک ڈاؤن کیا، جس کے دوران 9 ملزمان کو گرفتار کر کے 1 کروڑ 48 لاکھ روپے سے زائد مالیت کی 176.315 کلو گرام منشیات برآمد کی گئیں۔
ملتان میں شجاع آباد روڈ کے قریب 715 گرام آئس برآمد ہوئی، جسے ملزم نے تعلیمی اداروں کے طلبہ کو فروخت کرنے کا اعتراف کیا۔ کراچی کے سپر ہائی وے پر سبزی منڈی کے قریب ٹرک سے 106.8 کلو گرام چرس برآمد کی گئی، جبکہ نوشہرہ کے قریب رکشے میں 43.2 کلو گرام چرس پکڑی گئی۔
اسلام آباد میں گولڑہ موڑ کے قریب گاڑی سے 20.4 کلو گرام چرس برآمد ہوئی، اور 2 ملزمان گرفتار کیے گئے۔ میانوالی کے کالا باغ روڈ پر 3.2 کلو گرام آئس اور 2 کلو چرس بھی برآمد کی گئی۔ گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔
