میٹا کا عمر کی تصدیق کیلئے اے آئی ٹیکنالوجی استعمال کرنے کا فیصلہ

میٹا نے انسٹاگرام صارفین کی عمر کی تصدیق کیلئے مصنوعی ذہانت پر مبنی نظام متعارف کرانے کا اعلان کیا ہے، جو صارف کی اصل عمر کا اندازہ لگائے گا چاہے وہ غلط معلومات کیوں نہ دے۔

اگر کوئی صارف اپنی عمر غلط بتاتا ہے تو اے آئی ٹیکنالوجی اس کی حقیقی عمر کا اندازہ لگا کر 18 سال سے کم عمر افراد کو خودکار طور پر "ٹین اکاؤنٹس” میں منتقل کر دے گی، جن میں مخصوص پابندیاں شامل ہیں۔

میٹا نے ستمبر 2024 میں 13 سے 17 سالہ صارفین کیلئے ٹین اکاؤنٹس متعارف کرائے تھے تاکہ نوجوانوں کو محفوظ اور ان کی عمر کے مطابق تجربہ فراہم کیا جا سکے۔

کمپنی کے مطابق یہ فیچر ابتدائی طور پر امریکا میں آزمائشی بنیادوں پر پیش کیا جا رہا ہے۔ میٹا نے تسلیم کیا ہے کہ نظام میں غلطیوں کا امکان موجود ہے، اور صارفین بعد میں سیٹنگز ایڈجسٹ کر سکیں گے۔

آن لائن صارف کی اصل عمر کا تعین کرنا ایک بڑا چیلنج ہے، اسی لیے میٹا کا کہنا ہے کہ وہ نوجوانوں کے تحفظ کیلئے جدید ٹیکنالوجی استعمال کرتا رہے گا۔