نادیہ حسین کو فیک کال ایف آئی اے حکام سے منسوب کرنا مہنگا پڑگیا

پاکستانی اداکارہ نادیہ حسین کو فیک کال ایف آئی اے کے ڈائریکٹر سے منسوب کرکے سوشل میڈیا پر وائرل کرنا مہنگا پڑ گیا۔

نادیہ حسین نے تصدیق کے بغیر ایک فراڈ کال کو ایف آئی اے کے ڈائریکٹر سے جوڑا اور بلیک میلنگ کے الزامات لگائے، جس پر ایف آئی اے نے فوری طور پر انکوائری شروع کر دی۔ سائبر کرائم سرکل نے نادیہ حسین سے رابطہ کیا اور ان کے خلاف پیکا ایکٹ کے تحت کارروائی کی دھمکی دی ہے۔ نادیہ حسین کو اگلے ہفتے اپنا بیان ریکارڈ کرانے کیلئے طلب کیا گیا ہے۔

نادیہ حسین نے ایک نجی چینل سے گفتگو کرتے ہوئے بتایا کہ ایف آئی اے کی ٹیم آج صبح آئی تھی اور انہوں نے فون کال اور بیان سے متعلق معلومات حاصل کیں۔ اداکارہ کا کہنا تھا کہ سوشل میڈیا پر پوسٹ کرنے سے پہلے انہوں نے ایف آئی اے کو فراڈ کال کے بارے میں آگاہ کیا تھا اور واضح کیا کہ وہ کال جعلی تھی۔

نادیہ حسین نے مزید کہا کہ انہیں ابھی تک گرفتار نہیں کیا گیا، تاہم اگلے ہفتے ایف آئی اے کے سامنے بیان ریکارڈ کرانے کیلئے بلایا گیا ہے۔

واضح رہے کہ نادیہ حسین نے سوشل میڈیا پر ایک آڈیو پیغام شیئر کیا تھا، جس میں الزام لگایا تھا کہ ایف آئی اے حکام نے ان کے شوہر کے کیس میں 50 لاکھ روپے رشوت طلب کی تھی۔ انہوں نے اس فون کال کی ایف آئی آر درج نہیں کرائی، تاہم ایف آئی اے سائبر کرائم میں شکایت ضرور درج کرائی تھی۔