واٹس ایپ کی سروس متاثر ہونے سے صارفین کو دنیا بھر میں مشکلات کا سامنا

پاکستان سمیت دنیا بھر میں واٹس ایپ استعمال کرنے والے صارفین کو پیغامات بھیجنے، اسٹیٹس اپلوڈ کرنے اور گروپس میں مواد شیئر کرنے میں دشواری کا سامنا ہے۔

غیر ملکی میڈیا کے مطابق، صارفین نے ایکس (ٹوئٹر) اور فیس بک پر شکایات کیں کہ واٹس ایپ پر پیغامات دیر سے پہنچ رہے ہیں یا بالکل نہیں جا رہے۔ بعض صارفین کو تصاویر اور ویڈیوز بھیجنے میں بھی مسئلہ درپیش ہے۔ پاکستان میں بھی متعدد صارفین نے سروس میں تاخیر اور خلل کی شکایات کی ہیں۔

کچھ صارفین نے فیس بک اور انسٹاگرام کے حوالے سے بھی اسی نوعیت کی مشکلات کی اطلاع دی ہے۔ اب تک میٹا یا واٹس ایپ انتظامیہ کی جانب سے سروس میں خلل سے متعلق کوئی سرکاری بیان جاری نہیں کیا گیا۔

یاد رہے کہ واٹس ایپ، فیس بک اور انسٹاگرام تینوں پلیٹ فارمز میٹا کمپنی کی ملکیت ہیں۔