رہنما پیپلز پارٹی وقار مہدی سندھ سے سینیٹر منتخب

کراچی: پاکستان پیپلز پارٹی سندھ کے جنرل سیکرٹری اور وزیراعلیٰ سندھ کے معاون خصوصی وقار مہدی سندھ سے سینیٹ کی خالی نشست پر کامیاب ہو گئے۔

الیکشن کمشنر اعجاز انور چوہان کے مطابق، وقار مہدی نے 111 ووٹ حاصل کیے، جب کہ ان کی حریف ایم کیو ایم پاکستان کی نگہت مرزا کو 36 ووٹ ملے۔ 2 ووٹ غلط مارکنگ کے باعث مسترد کیے گئے۔

یہ نشست پیپلز پارٹی کے مرحوم سینیٹر تاج حیدر کے انتقال کے بعد خالی ہوئی تھی۔ وقار مہدی اس سے قبل بھی سینیٹ کے رکن رہ چکے ہیں۔

وزیراعلیٰ سندھ مراد علی شاہ نے وقار مہدی کو سینیٹر منتخب ہونے پر مبارکباد دیتے ہوئے کہا کہ اُن کی کامیابی پیپلزپارٹی پر عوامی اعتماد کا مظہر ہے۔ چیئرمین بلاول بھٹو زرداری کی قیادت میں پیپلزپارٹی ناقابل شکست بن چکی ہے۔ پیپلزپارٹی عوامی اور پالیمانی محاذ پر مسلسل کامیابیاں سمیٹ رہی ہے۔ پیپلزپارٹی جیسی مقبولیت کسی جماعت کے حصے میں نہیں آئی۔