پاکستان ایئرپورٹ اتھارٹی نے اہم پابندی عائد کردی

پاکستان ایئرپورٹ اتھارٹی نے جہاز کی دیکھ بھال کے دوران فوٹو اور ویڈیو گرافی پر پابندی عائد کردی

پاکستان ایئرپورٹ اتھارٹی (پی اے اے) نے کراچی ایئرپورٹ پر جہاز کی دیکھ بھال کے دوران فوٹو اور ویڈیو گرافی پر پابندی عائد کر دی ہے۔ اتھارٹی کا کہنا ہے کہ کچھ افراد ایئر کرافٹ مینٹیننس آپریشنز کی غیر مجاز تصاویر اور ویڈیوز لیتے ہوئے پائے گئے ہیں۔

پی اے اے کے ترجمان نے ایک بیان میں کہا کہ ایئرپورٹ پر تصاویر اور ویڈیوز بنانا سیکیورٹی اور رازداری کی سنگین خلاف ورزی ہے۔ اس سلسلے میں پروٹوکول پر سختی سے عمل کیا جائے گا تاکہ سیکیورٹی اور رازداری کو یقینی بنایا جا سکے۔

صرف مجاز اہلکار، انجینئرز اور متعلقہ اراکین کو تصاویر اور ویڈیوز بنانے کی اجازت ہوگی، جبکہ جی ایچ اے اور آپریٹرز عملے کو فوٹو گرافی یا ویڈیو گرافی سے سختی سے منع کیا گیا ہے۔

پاکستان ایئرپورٹ اتھارٹی نے یہ بھی کہا کہ پروٹوکول کی خلاف ورزی کرنے والوں کے خلاف سخت انتظامی اور تادیبی کارروائی کی جائے گی۔